अबब ! नागपुरातून चक्क १ कोटी ५३ लाख रुपये किमतीची एसटी महामंडळाची 'शिवाई' इलेक्ट्रिक बस अमरावतीला चोरून नेली (Incredible! An ST Corporation 'Shivai' electric bus worth a staggering ₹1.53 crore was stolen from Nagpur and driven to Amravati.)
एसटी महामंडळाच्या सर्व बसेसमध्ये 'व्हेइकल ट्रॅकिंग सिस्टीम' (VTS) बसवण्यात आली आहे. बस चोरीला गेल्याचे समजताच नागपूर विभागाच्या अधिकाऱ्यांनी तात्काळ इंटरनेटवर या इलेक्ट्रॉनिक चीपच्या माध्यमातून बसचे रिअल-टाइम लोकेशन ट्रॅक केले. तेव्हा ती बस अमरावतीजवळ हायवेवर असल्याचे स्पष्ट झाले. नागपूर कंट्रोल रूमने तातडीने अमरावती पोलिसांना अलर्ट केले. दरम्यान, अमरावतीच्या राजापेठ पोलीस ठाण्याच्या हद्दीतील नंदा मार्केटजवळ एक संशयास्पद बस उभी असल्याची माहिती पोलिसांना मिळाली. तसेच बस पळवणारा तरुण गद्रे चौकात असल्याची टीप मिळताच, राजापेठ पोलिसांच्या डीबी पथकाने सापळा रचून बससह चोराला बेड्या ठोकल्या.
पोलिसांनी अटक केलेल्या आरोपीचे नाव विष्णू गणपती नीलावर (वय २३, रा. हईत नगर, जि. रंगारेड्डी, तेलंगणा) असे आहे. प्राथमिक चौकशीत त्याने गुन्ह्याची कबुली दिली, पण पुढील तपासात जे समोर आले त्याने पोलिसांच्या पायाखालची जमीनच सरकली. या आरोपीने आतापर्यंत तेलंगणा आणि आंध्रप्रदेशातून तब्बल २० हून अधिक सरकारी बसेस चोरल्या आहेत! महाराष्ट्रातील नांदेड बसस्थानकावरूनही त्याने यापूर्वी एक बस पळवली होती. पोलीस तपासात समोर आले की, या अट्टल चोराला केवळ बस चोरून ती घेऊन फिरण्याची सवय आहे. ई-बस पळवल्यानंतर तिची चार्जिंग संपली की तो ती रस्त्याच्या कडेला उभी करायचा आणि त्या बसचे महागडे टायर्स व बॅटरी काढून बाजारात विकायचा. या कुख्यात आंतरराज्यीय चोरावर आधीच वजिराबाद, तिरुमला सीसीएस यांसह अनेक पोलीस ठाण्यांमध्ये गुन्हे दाखल आहेत. एसटी महामंडळाची ट्रॅकिंग सिस्टीम आणि नागपूर-अमरावती पोलिसांची सतर्कता यामुळे चोर पोलिसांच्या कचाट्यात अडकला.
संपादक :- दिपक चरणदास भगत, (विद्याश न्युज), मो. 9421717068
0 टिप्पण्या